Downloads: 

ABU LINK 

The Trimonthly Newspaper of Adi Baptist union

For private circulation only

 

Ikisirung newspaper

Aro  Agom  Agínpe  Lulangka: Pasighat 20.02.2017

Konnying mennying  eso  kaabomna  kook kone  doolung  ami  kídíem  yatkítope emla  míngkane  simyo  kamape  ‘Simyo emoko’ emla  ulo  gokto.  Delo  doolung  amie  arue  emla dukdum suto.  Delo  yatna  koode  doolung  amidem  yatto name,  aro  aro  emla  ngilkang  lattoku.  Delo  ami kídíde   marla  agí  agí  ekumlo  gíkaku. Méélam  dem  arope  simyoko  aala  koodem  dope  emla  ibomkai.  Delo  koode ‘Simyo emoko’ emla  ulo  goktoku,  delo  doolung  amie  bikke  yatnam  dem  míngge  dula  atelkote  kangaana  katomang.  Delo  bím  simyoe  donyokto. Depe ila  letelkote  menam  agom  lumapeka,  menam  agom  luna amiem  takame  arope  míímang.

Tírkot  Abbuk  Sokke  Dooyinge

Si  abbuk  si  Komming  sahabke  abbuge.  Komming  sahab  bí  Dukyon  Lego kíng  kolíkla  bí  reto.  Rerongem  ekumlo  bomtoku. Jerusalem aranglo photo

Dígín  roh konem  Dukyon  bí  abbuk  sim bomla  aptalo  gílento.  Delo  bí  Sikang  Korong puumilo  magooto.   Oolko  gíduem  bí  puumi  delo  jaktumko  gírík suto.  Jaktum dem  kaasula  Dukyon  abbuk  sok  lennyiko  apto.  Aprodem  bí  ekumlo  entoku.

Longe  kondem  apnam  benjak  dem  matape  gílen  toku.  Delo  lelam dem sigbomto.  Lelam signgo  dungem  jaktum de lenbom  toku.  Delo  Dukyon  bí  depe  epe  idí  kaimala  abbuk  delok  apyam líkto.  Riatagam  jaktum dem  alílok  aptem toku.  Aprong  dem  jaktum de  bíkkíng  dugala  bím  tupletto.  Tublet  pala  bím  oolko  dakok  bomdola  dakkai.  Oolko  doorongem  jaktumde  ampeng  pak  delo  gíla  ketkayane  silíkkai. Delo  Dukyon  bí  beyiope  darep  langkula  ekumlo  entoku.  Enlang  kula  jaktume  sikai  emla  doolungem  potoku.  Dem  tatla  doolung  ami  kídíde  ashéto.  Delo  bulu  egíng  eyogem  gela  enkai.  Benjak  delo  pííla  tekpan sula  doolung de  adín  getoku.

Uut  Simon

Si  ingko  simonko?  Simon  si  uut  simonko.  Uut  simon si  siteme  kedon  yadung.  Bulum tanie  sita  bomnam  kíshape  bomdung. Esing  elíng  ííng  atí  kaimape  siye  yepolpe  iko  amolo,  uut  simon de  taniem  airupe  iguldung.  Arab  amode  mail  língko  annyi  angumpe  yepole  idung.  Delo  amodelo  tanie  donam  tíínam  atí  takamem  uut  simon  teyolo  melíkla  endung.               Jordan korong photo

Uut  simonde  Adi  eso  kíshape  lepuk  gemang.  Bíkke  ale  lepyo  lakpyode  sita  kíshape  idung.  Eso  kíshape  lebok  kote  gemang.  Depe  ila  bulu  pamkiko  amolo  longo  longképe  gíladung.  Bíkke  derdide  lamku  danlo  kadung.  Depe ila  tanie  duuporupe  duudo. Delokke  uut  simonde  akiilo  doone  pumpong  genamde  sita  kemte  botte  yadung.  Depe ila  bulu  doonyi  pamkie,  deddí  dakkom  pesomang.  Mooruk  amolo  gíyem  bulu  delok  asiem  laasula  tíídung.

Pekung Kelang Také Dooyinge

Konnying  mennying  adii  telo  longe  konem  Líípo  kone  siibe  kolok  tatar  amíko  rekbomla dukdak.  Depe  iduem  rumkíng belo  pekungko  kotlomto.  Mamam sula  líípode  tatar  amídem  meletto.  Melet  toname  tatar  amide  sidumko  opokto.  Delo  sidumde  mamam sula  dukkane,  elíngko  tukalto.  Elíngde  longkane  kolungko  loosotto.  Loosotnam  kolung de  yutkane  asi  paatang  kolo  yudangkai. 

Delo  kolung de  také  amikko  yuttupto.Delo  takéde, “Ngokke  amik  sim  nomin  ipettone”  emla  kolung dem  ajéng  luto.  Kolungde  mankane, “Mologe,  ngomte  dabuemin  loosottone”  emto.  Demílo  emla  takéde  dabudem “Nomino  ngokke  amik sim  ipettone”  emla  ajeng  luto.  Delo  dabude  mankane,  “Mologe,  ngomte  sidum  konemin  tukal tone”.   Demílo  emla  také de  Sidum  dem  ajeng  luto.  Sidumde  mankane, “Mologe, ngom  tatar  amide  olom  mamílo,  ngo  dukla  dabudem  tukal  mayai,  ngo  ajeng  dem  dormaye”  emto.  Demílo  emla  tatar  amídem  takéde  lutoku. Delo  tatar amide  mankane, “Menam,  ngo  ajeng  dem dormaye,  ngom  líípo  emin  melet  tone,  demamílo  ngo  olet  mayai.”

Dekemílo emla  takéde  líípo dem  ajeng  lutoname  líípode  mankane,  “Mologe,  ngom  pekunge  amo  belo  doola  mamam  sudope  kotlom  mangamílo,  ngo  tatar  amídem  melet  mayai.  Ngo  ajeng  bimaye”  emto.  Delo  takéde  pekung dem  ajeng  lutoku.  Delo  pekung  de  agom  pogepeko  kaimang.  Takéde  ajeng  dem  lubom  tetengkai.  Pekung de  dornana  kamape  ikane,  dugge dula  bikke  agí  tamé  dem  bukut  subito.  Depe  ila  peku si  silo  melope  tamé  kaimang.  Delo  také  amig  dete  yuttup  rongem  lutlen  ayarla  yekai.

Kandari  Annyi  kelang  Sibééke  Dooyinge

Konnying  mennying    longe  konem  kandari  annyi kone  gíman gone,  kandari  akonde ettíng  alemko  paato.  Ettíng  alem dem  kaala  kandari  akonde  kaabokai,  alem  delokke  legape  momín  sukai.  Momín  suduem  Sibéé  kone  kaala  kandari  annyidem  luto, “Kandari  annyie,  ngok  lunam  sim  itoka.  Dem  imílo  airupe  aiye.”  Sibééke  depe  lunam  dem  tatla  kandari  annyi de  tolíkto.  Sibééde  gula  kolok  sér  kíkí  nanako  lala  kíkí  bito.  Attung konde  bojeyato  mílo,  anyongko  lala  doto  dandan  ito.      Depe  ila  ila  Sibéé  de  ettíng  alem  dem  doyin  pala,  esing  siine  teyong  kolo  gésang  kaku.  Delokrongem  de  kandari  annyide   sér  kíkí  nana  dem  kangkí  kangkíla  idung.  Delo  gula  atode  aala  ine,  kandari  annyi  dem  dííla  mola  monpakto.Depe  ila  momín  sumape  aipe  dobo  sulangka

Kangkong  Kabangke  Legange

Mennying  konnying  Kangkong  Kabang  emnam  abíng  kumsu  ami  annyiko  katuai. Delokke  ami  annyi  delokke  opíne  Peryinge,  bulu  yagorupe  mirem  opínpe  idungai.  Depe ila  binyi  migange  ito.  Dekepe  binyi  migala  ami  takamke  atíem  patung  payu  bila  ito.  Depe ila  binyim  doolung  takame  gééto,  gééla  doolung  de  poru  bosula  lukai, “Binyim  duula  bosumang,”  emkai.  Depe  emla  doolung  de  arope  Kangkong  melang  Kabang  me  erak  rakdíng  kolo  gíníng lok  nikpok líkto.  Depe  ila dem níkpok  líkko  erakdem  silo melo  ngoluke  amie,  “Kabang  níkpok  erak”  emdung.  Debong.

Koopung  Píkér  sunam  Legange

Mennying  konnying  Minur  Lomang  yogmoko  kadungai.  Delo  yogmo delo  sibéé  dela oosong de  koopung  pipe  emla  aane,  oosong  kedem  pípo  bito.  Pípo  bitoname,  sibéé  marla  Minur Lomang  yogmodem  ityi  epuklok  apkato.  Apkapala  ekusérang  simang  kídídem  asilo  líkto.  Líktoname  aside  yubomkai.  Depe  asilo  yudagnem  ayinge  simangem  tíla  yuto.  Depe ila  silo  meloke  aying  yogmue  atí  iramnam  kamang.Dekepe  ila  Minur  Lomang  yogmome  asilo  líkdo  emla,  Bísi   Yada  yogmo de  Sibéé  dem  elingem  bangír  pala  umképe  bommoto.  Bommo  toname,  sibéé  ekongem  bangkamto.  Depe ila  silo  melo  sibéé  ekonge  kootal dung.