Adi gomuklok inam

Downloads: 

 

                                       Kaamoloké Angunlo  (From Darknéss to light)

 

                Ngoluké Country si yénamém yékíla yéna aku country ko. Kénna paana rupé akupé yéné bojéko kato. Buluké akonlok kumnamé siképé potung:

                                               “Asathoma Satgamaya”

                                              “Thamasoma Jyothirgamaya”

                                              “Mrithyorma Amrithamgamaya”

                                               Si Ngoluké sanskrit aku agomé,

                                              “Aromalokké Arolo ngom gíboyika”

                                              “Kaamolokké Angunlo ngom gíboyika”

                                               “Sikolokké Turkolo ngom gíboyika.”

Édítna aroruuna (meaning kana) kumnamko si. Atí takamé duuyar pémangko tani among gooraso ngolu dudung. Tani amoso duuyar péna atí kamang. Tani amoso ngolu atíkoté duuyar bomlamang. Dékédé ngolum mépak mangké bulum ngolu mépak yéku.. Amoso turla taniké yénam si anyodung. Démílo yépénamlo kapé iyén? Turpala sirongém atírung kaimapé iyénía? Yéyin pékodé kapé pak idun? Tanié kapéila sipé (death) aikan? Ingkínam agom kídí sok légapé ngolu poyan sunam matadung. Séko sikésim poyan subilayén? Ngolum lubo ibonako kayén?.  É, siképé ponako kadung, “Ngomin Turnamé.” Bí JISU KRISTO. Jisu bímin Téyong among (héavén) légang émlang Doorum lísam (héll) léngangém jonnampé pobitoné. Sirongém duuyarna among annyiko kadung dém Bí bérokrupé pobito. Akondé Téyong amongé (heaven), dé aséngko amongé, délokké akondé Doorum lísam(hell) amongé, dé adír díryarko amongé, so ami kídíé ingeey namém paadung. Jisu Kristo bí tani gídangém duuyarna aro atíém léngkanto.

                Kumnam akondé idung, “Kammolokké Angunlo ngom gíboyika.”  Ngolu kaamolo dung;  aapíé kaamolo dung; aid aapíé kaamolo dung. Ngolu aro émlang turyar namém  kenma bérokpé dudung. Ngolu shédí aromé kenmang! Bíkké bédangém, Bíkké míisangém délokké ngoluké amílké kaapa manam takamém kenmang. Ngolu takamé kaamolo turyarna atíiém bojépé madung. Ngolu Jisu kélok paabém maab kosupala Téyong amolo  gílíng dungku, idokom  ngolu énpéko  bédang kenmang,  légadé idung kanamé atí takamé kaamué délokké míipet péko kaimang. Ngolu  arolokké gípék  léndung. Séko méruém rukanla ngolum Bédangém énboyén?.” Jisu Bí ngolum kaamo  lokké Angunlo gílík lané.

                Akon kumnamé  siképé poyindung, “ngom sinam  lokké turnamlo gílík yika.” Sinamé ngolum  ruutum bomdung; déké ékéna dormolai délokké déké ékéna opínlai ami takamém sinamé ngolum rutum bomdung. Si mirém opan kangu sumapé, kenna kenmang kaapan sumapé, roja rutum luunébané ingusumapé, réyiina alaklok takamém gakbomdung. Aropaklok pomílo sinamdé, tani gíidasok gílénnam pétommang, idola shédí kélokké agínpé gípék lénla délokké Doorum  liosamlo aanam démin. Turnam émnamdé, yéyarnam, Téyong amonglo duulík kunam. Sikolokké turkolo gíboyika émnam dé,Doorum lísam lokké Téyong amolo gíboyika  émnamé. Adín  amíl lok sinamdé sokké turyarko among konlo aalíknamé: dé Téyong among mangké Doorumlísam amongé. Démílo sékoi ngolum, ‘Turyarko amolo’ gílík lanadé? Amiko kadung, bí arué,  anguné, délokké Turnamé.  Bímin  Rutum jisu kristo, bí poto, ‘Ngomin Arué’  ‘Ngomin Anguné’ délokké ‘ Ngomin Turnamé’. É  simin kumnamém aropakpé  poyan sunamé.

                Kapé kísha jisu bí Arué, anguné délokké turnamé émsukané? Bí poladung, kapéila bí shédíé, ami takamém among asiém délokké doonyi angunném pílénné. Idakkom bíkké kaanampé ami takaamé  arolokké,yéji namlokké, ayoon lokké délokké bíkké lokké gípék lénkai. Angu angu bédanglok bulum bí luyil kíto délokké bíkké miinamém pokandopé kaaluna miri kídíém mégoolíkto. Mélam yalumpé bí  amoso téyong amonglok píito délokké ‘tani’ kíshapé olén kosuto idola paab kamapé bébínpé yéto.

                Pílénna bí édílo tani kísapé itodí, délo bím ‘JISU’ émto,dépé émnamdé ‘paabém maab bina’. Bím asia amoso oto. Tani among sokké  uadanlok aina atíé  bojéko ainé aadung, sanggo danlok  botté yalumna amané,among sok gérnamé píidung. Idakkom jisu bí asia ami pétomém ayato émnam kamang. Among  sokké botté botténa continént lok amiém ayato. ‘bí tani  amongém ayato  émla Baiblé é podung. Bí siirépto délokké  33 dítag lopé tani amípé  yéto. Siképé yéduém ami kídíé kapé yépé aidodí délokké tani gíidaso Bíkké aabomnam légagém pobito. Ami kídíém luyil dula buluké míiyi mísang aapíém kaato. Bí bulum turnam ké arang atíém pobito.

 

Bí léko siang asi sinungé éétét dokupé lutumto. Bí ukum bila ukkínamé pésorunam kinam été aitoku tíd kina kídíém déémo toku, tumné péngong kaku. Bí migmaném kaado kupé ito, agom pomaném podokupé itoku délokké rubeném taddo kupé itoku. Bí sila dooném gérép motoku. Sim atí takam sim bíkké igadé Bí Shédíé émnam dém amiém léngkanpé miito. Bímin pílénné délokké Bí sinam kélang kaamoké pawarém bomdung. Idakkom bíkké tani among so aabom namé dé pétom mang. Bíkké aabom namdé ami takaam légapé sibidopé émnamdé. No arí anyopé míiyépé kapila tani among sok ami takamké légapé létéllok buluké paab légapé sigépé lagikai.

                Bí dééna kuai, Bíkkíng sékoté paab kangkét mang. Ukil rutumé téng takamém kaayin géyéla Jisukíng imém ajéng paamato. Bíkké sigé namdé nokké pélang ngokképé Bím ingeynamé. Si takam légapé agiém binyok sunamé. Délo anguyang kamang. Takamé paab ila shédíké  angun ralnamlo píiramkai. Ngolu takamé doorum lísamlo gíbangkai. Ngolukélok sékoté paab imana kamang. Idakkom ngoluké  paab imém légapé  bím ireyto. Ngoluké yeponam légapé ingey é  bíkkíng dungkai, délokké bím démngey kolok ngolum ipítoku.  Bí agílo ngoluké paapénam ingeeyém gébíla sigékai. Ngolu ‘jamindari é,Bíkké lalénkunamé. Jisu  kristoké kékonlo sékokom  tani among tabungém ayana  délokké takam  légapé  agíé  agíké  yénamém binyok  suna yéruk dooyinglokom paamang.

                Bí sito,sipala sikoloké  géréptoku. Bí sinam lokké gérép toku  délokké  siyi kumayé. Bí adín amílrupé  téyong among (Heaven) sangkaku. Bíkkíng luyilsuna  kídíé, téyong among saadak kupé bím kaato. Bulu  bím  kumsuto délokké  ingkolo  gítodí bíkké amínlok paabém maab kunam”tatpona  dooying” ém pogooto. Bíkké  aalat dokulopé tani  gíidaso sim pogooyé. Yéyin longélo bí bisar kakupé émla lékoda amoso aadakku, dé anín dubong. Supak no nokké paabém bursu langkula bíkkíng míngké sukumílo no paabém maab namém paayé. Rutum Jisu Kristokíng míngké sulangka délo turnamém paayé.

Si ngiitom si aropé torík suba naméké, dépé émnamdé Kristo Jisu bí tani amoso paabna kídíém mosing kakupé émla aato.

                Nokké paablok míilat sulang kuka délokké Ruutum Jisu Kristomé míngké sulangka.

India Évéry Homé Crusadé

Régional Officé

9 – 2 – 763 St. Francis Stréét

Sécondérabad – 500 025

Andhra Pradésh 

 

Rumkíng ke kitab kídar si Adi agom lok tuplen kuname.

jisukepotu.jpg